Суоттуга эдэр суруйааччылар сэттис семинардара
От ыйын 18-20 күннэригэр Саха сирин Суруйааччыларын сойууһа, «Саха сирин суруйааччыта» ассоциация өйөбүлүнэн, Суоттутааҕы айар маастарыстыба семинарын тэрийэн ыытта. Бу айар ыччат түһүлгэтэ, үгэс быһыытынан, «Доҕордоһуу» Өлүөнэтээҕи история-археология музей-заповеднигар ыытылынна.
Маастардарынан норуот суруйааччылара Наталья Харлампьева, Сэмэн Тумат, Куорсуннаах, М. Горькай аатынан Литература институтун доцена Аита Шапошникова, СӨ үтүөлээх суруналыыһа Данил Макеев, «Чолбон» сурунаал бас эрэдээктэрэ Гаврил Андросов, В.К. Арсеньев аатынан «Уһук Илин» бүтүн Россиятааҕы литература бириэмийэтин лауреата Анатолий Слепцов, «Далбар Хотун» сурунаал бас эрэдээктэрэ Зинаида Архипова, Эдэр литератордар сүбэлэрин салайааччыта Рустам Каженкин үлэлээн, прозаҕа, поэзияҕа, оҕо литературатыгар, маастар кылаастары ыыттылар, лекциялары аахтылар.
Семинарга былырыыҥҥы Эдэр суруйааччылар өрөспүүбүлүкэтээҕи сүбэ мунньахтарын түмүгүнэн, сахалыы суруйар эдэр ааптардар, ол иһигэр Эдэр литератордар сүбэлэрин чи' лиэннэрэ, кытыннылар. Ол курдук, Валерий Андросов проза, Анна Колосова оҕо литературатын секциятын бастыҥнара, Мария Винокурова, Сардаана Корякина оҕо литературатыгар, Мария Андреева, Римма Крылова, Сюзанна Кондакова, Оксана Васильева поэзияҕа бэлиэтэммиттэрэ. Оттон Утум Захаров драма секциятыттан саха академиялыы тыйаатырын сыанатыгар турбут испэктээк ааптарыгар тиийэ үүммүт кэскиллээх литератор.
Кыттааччылар айымньыларын «Эдэрдэр куоластара» рубрикаҕа кэрэхсээҥ.
