Сулҕаччыга поэт Сэмэн Капитонов үбүлүөйүн бэлиэтээтилэр
Амма улууһун Сулҕаччы нэһилиэгэр поэт, Амма улууһун, Сулҕаччы уонна Соморсун нэһилиэктэрин бочуоттаах олохтооҕо, СӨ култууратын туйгуна, Арассыыйа уонна Саха сирин суруйааччыларын Сойууһун чилиэнэ, ”Гражданскай килбиэн” бэлиэ хаьаайына Семен Капитонов 70 сааһын төрөөбүт дойдутугар Сулҕаччыга бэлиэтээтилэр. Үбүлүөйгэ анаммыт тэрээһиннэр сайыҥҥыттан саҕаланан күһүн түмүктэннилэр.
"Хааччах кэмэ буолан биллэн туран тэрээһиннэрбитин ыытыыга уустуктардаах буолла. Сэмэн Спиридонович үбүлүөйгүн бэлиэтээһин биһиэхэ былааҥҥа эрдэ киирбитэ. Ол курдук сайынтан саҕалаан араас күрэхтэри биллэрбиппит. Хоһоон суруйар ааптардар күрэхтэрэ, хоһоону хаартысканан дьүһүйүү, ырыа буола илик хоһооннорго мелодистар күрэхтэрэ уонна поэт хоһоонун иэйиилээхтик ааҕыы күрэхтэрэ ыытыллан 100-тэн тахса киһи кытынна. Онтон олус диэн үөрдүбүт, өрөспүүбүлүкэбит араас муннуктарыттан кытыннылар, биһиги, тэрийээччилэр, улахан махталбытын тириэрдэбит", - диэн кэпсиир Сулҕаччытааҕы модельнай бибилэтиэкэ кылаабынай бибилэтиэкэрэ Елена Попова.
Дьоро киэһэҕэ күрэхтэр кыайыылаахтарын билиһиннэрдилэр, кинигэ быыстапката турда, эҕэрдэ кэнсиэр буолла. Суруйааччыны улуус баһылыгын э.т. Иннокентий Климентов, Сулҕаччы нэһилиэгин баһылыга Афанасий Ксенофонтов, култуура управлениетын салайааччыта Иван Иванов, В.М. Новиков аатынан киин бибилэтиэкэ дириэктэрин солбуйааччы Светлана Макарова, Таатта улууһуттан бииргэ үөрэммит үөлээннээҕэ Зоя Санникова - Үчүгэй, Соморсунтан Дархан култуура дириэктэрэ Надежда Игнатьева, бибилэтиэкэрэ Ксения Давыдова, орто оскуола кэлэктиибэ, суруйааччылар Саргылана Гольдерова-Саргы Куо, Любовь Горохова-Сүүмэх, Сулҕаччы тэрилтэлэрин салайааччылара эҕэрдэлээтилэр, алгыс тылларын анаатылар.
"Мин билигин кэргэним Булуҥ улууһугар үлэлии барбытынан онно баарбын. 70 сааспын дойдум дьоно төһө да хааччах буоллар наһаа тэрээһиннээхтик бэлиэтээтилэр. Соморсуҥҥа эмиэ буолан ааспыта. Аны бу Сулҕаччыга бара турар. Элбэх күрэхтэр тэрилиннилэр. 70 сааспынан “Айар” кинигэ кыһатыгар айымньыларым тахсыахтаахтар. Бэйэм инники былааммар хоту дойдуттан хайаатар да саҥа айымньылаах аны сайын эргиллиэм дии саныыбын", - диэн поэт Семен Капитонов санаатын үллэстэр.
Бу күн Сулҕаччы орто оскуолатыгар суруйааччылары кытта көрсүһүүлэр буолан эмиэ умнуллубат өйдөбүлү хааллардылар.
