САХА СУРУЙААЧЧЫЛАРА ПОЭТ ГАБДУЛЛА ТУКАЙ ДОЙДУТУГАР
Татарстаҥҥа Саха сирин күннэрин чэрчитинэн бэс ыйын 6 күнүгэр саха суруйааччылара татаар норуодунай поэта, литературнай кириитик, уопсастыбаннай деятель, тылбаасчыт, публицист Габдулла Тукай төрөөбүт-үөскээбит сиригэр Кырлай, Кошлауч бөһүөлэктэригэр ыалдьыттаан кэллилэр.
Саха норуодунай поэта, Саха сирин суруйааччыларын сойууһун бэрэссэдээтэлэ Наталья Харлампьева Габдулла Тукай олоҕун-дьаһаҕын саха литературатын төрүттээбит суруйааччыларбыт, судаарыстыбаннай деятеллэрбит дьылҕаларыгар ханыылыы тутан туран, саха уонна татаар литератураларын хардарыта үлэлэһиилэрин туһунан билсиһиннэрдэ. Санатан эттэххэ, былырыын Казань куоракка саха поэзиятын антологията икки тылынан бэчээттэнэн тахсыбыта. Ол иннинэ “Үрүҥ хаар алгыһынан” поэзия аан дойдутааҕы фестивалын түмүгүнэн татаар аныгы литературатын антологията Дьокуускайга тахсыбыта. Ону сэргэ Саха сирин уонна Татарстан сурунаалларыгар хаһыаттарыгар суруйааччылар, поэттар тылбаастара тиһигин быспакка бэчээттэнэллэр.
Саха сирин суруйааччыларын дэлэгээссийэтин Татарстан Өрөспүүбүлүкэтин суруйааччыларын сойууһун бэрэссэдээтэлэ, норуодунай поэт Ркаил Зайдуллин иилээн-саҕалаан илдьэ сырытта.
