Литературная Якутия


 
11.06.2021
 
Аграфена КУЗЬМИНА

САХА ПОЭЗИЯТЫН АНТОЛОГИЯТА КАЗАНЬ КУОРАККА СҮРЭХТЭННЭ

Казань куоракка Саха сирин күннэрин чэрчитинэн саха уонна татаар литературатыгар олус дириҥ суолталаах көрсүһүүлэр, кэпсэтиилэр буола тураллар. Олортон биирдэстэринэн татаар тылынан тахсыбыт саха поэзиятын антологиятын уонна татаар аныгы поэзиятын антологиятын сүрэхтэниилэрэ буолар.

 

Саха поэзиятын антологиятын Саха сирин суруйааччыларын сойууһун көмөтүнэн былырыын күн сирин көрбүтэ. Кинигэҕэ Өксөкүлээх Өлөксөйтөн, Алампаттан, Ойуунускайтан саҕалаан билиҥҥи көлүөнэ поэттарын айымньыларыгар тиийэ таҥыллан киирдэ. Сахалыы хоһооннору татаар биллэр-көстөр поэттара Ркаиль Зайдуллин, Галимьян Гильманов, Рузаль Мухаметшинов, Лилия Гибадуллина о.д.а. тылбаастаатылар.

 

Татарстан норуодунай поэта, Татарстан Өрөспүүбүлүкэтин суруйааччыларын сойууһун салайааччыта Ркаиль Зайдуллин Саха сиригэр “Үрүҥ хаар алгыһынан” поэзия аан дойдутааҕы фестивалыгар кэлэ сылдьыбытын, Арассыыйа биир кэрэ дойдутун кытары билсибитин, суруйааччылары кытары доҕордоспутун өрө көтөҕүллэн туран кэпсээтэ. Бу маннык көрсүһүүлэр ыллыктаах, кэскиллээх буолалларын этэн туран: “Саха тыла, саха норуота олус дириҥ историялаах. Төһө да биһиги бары биир түүр тыллаах омуктар буолларбыт, сахалар дьиҥ төрүт тылларын, үгүс түүр норуоттарыгар эргэрбит, сүппүт тыллары, илдьэ сылдьалларыттан тус бэйэм сөҕөбүн. Бэйэлэрин урааҥхай сахаларбыт дииллэр, ол тыына айымньыларыгар бэриллэр. Онон сахалыы айымньылары тылбаастыырбыт биһиэхэ икки төгүл долгутуулаах”, – диэн бэлиэтээтэ. Уонна Суруйааччылар сойуустарын иһинэн үлэлиир уус-уран тылбаас киинин арыйалларын туһунан иһитиннэрдэ.

Антологияны Саха сирин суруйааччыларын сойууһун бэрэссэдээтэлин солбуйааччы, “Чолбон” сурунаал сүрүн редактора Гаврил Андросов хомуйан оҥорбута. “Икки түүр тыллаах норуоттар доҕордоһууларыгар өссө биир далаһа бырахтыбыт дии саныыбын. Бу саха уонна татаар литератураларын историятыгар биир бэлиэ түгэн”, – диэн сүрэхтэнии кэмигэр бэлиэтээн эттэ.

Манна даҕатан эттэххэ, 2017 сыллаахха Саха сиригэр татаар аныгы поэзиятын антологията бэчээттэнэн тахсыбыта. Татаар литературатын Наталья Харлампьева, Сэмэн Тумат, Урсун, Куорсуннаах, Аита Шапошникова, Гаврил Андросов, Рустам Каженкин сахалыы саҥардыбыттара. Бу антологияны Татарстан кинигэтин кыһатын сүрүн редактора Ленар Шаех бэлэмнээбитэ. Кини төрөөбүт төрүт тылгар ханыылыы тыллаах норуот уус-уран айымньыларын тылбаастыыр олус долгутуулааҕын, эппиэтинэстээҕин бэлиэтээн туран, бу курдук үгүс эйгэҕэ санаабытын, сүбэбитин түмэн бииргэ үлэлэһэрбит буоллар диэн баҕа санаатын эттэ. “Национальнай өрөспүүбүлүкэлэр буоларбыт быһыытынан биһиги бэйэбит уратылаахпыт. Төрөөбүт төрүт тылбытын үөрэтэрбит, сайыннарарбыт биһиэхэ улахан оруоллаах. Онуоха литературалар доҕордоһуулара биир сүрүн оруолу ылар. Сахалыы, татаардыы икки антология таҕыста. Доҕордоһуубутун кинигэнэн бигэргэттибит. Манан эрэ муҥурдаммакка салгыы үлэлэһэр санаалаахпыт”, – диэн эттэ.

Антологиялар сүрэхтэниилэрин түмүгэр Саха сирин суруйааччыларын сойууһун бэрэссэдээтэлэ, саха норуодунай поэта Наталья Харлампьева:

– “Ойуурдаах куобах охтубат” диэн сахаҕа олус мындыр өс хоһооно баар. Ити литературалар тылбаас нөҥүө доҕордоһууларыгар олус улахан суолталаах. Тоҕо диэтэргин антология биир эрэ киһи айымньытын кинигэтэ буолбатах, манна элбэх ааптар киирэр, тылбаасчыт үлэлиир. Онуоха тылбаасчыт уонна ааптар уопсай тылы булуулара сүрдээх улахан ис хоһооннонор. Тылбыт-өспүт, олоҕу көрүүбүт, ону анаарыыбыт барыта түмүллэн киирэр. Онон литературалар икки өттүттэн тэҥҥэ далаһа бырахпыттара бүгүн кэлэн биир ситим буолла, – диэн бэлиэтээтэ.
 
Ааптар хаартыскаҕа түһэриитэ

Источник: «Эдэр саас»