Олег Сидоров: «Саха сиригэр чугаһатар баҕалаахпыт»
Быйыл аан бастакытын “Экопикник с Короленко” диэн айылҕаны кытта ситимнэһэр бэстибээл буолан ааста. Бу бэстибээл үөрүүлээх аһыллыытыгар Саха сирин суруйааччыларын Ассоциациятын бэрэссэдээтэлэ Олег Сидоров саҥа уопсастыбаннай литературнай бириэмийэ олохтоммутун туһунан иһитиннэрдэ. Бу бириэмийэ лауреаттара буолар иһин кимнээх кыттыахтарын сөбүй?
«Бу “Экопикник с Короленко” диэн айылҕаҕа ыытыллыбыт тэрээһини нуучча билиҥҥи кэмин биллиилээх суруйааччылара бэркэ интэриэһиргээтилэр. Кинилэр Амманы Короленко нөҥүө билэллэр. Сорохторо манна өссө сылдьыбыттара. Инникитин өссө кэлэн кытталлара буоллар олус үчүгэй буолуо этэ. Оннук баҕалаахтар даҕаны. Онон мин саныахпар бу тэрээһин сыллата буолара буоллар, нуучча билиҥҥи суруйааччыларын манна ыҥыран сырытыннаран, Аммабытыгар эрэ буолбакка, уопсайынан Саха сиригэр чугаһатыа этибит. Ити сыалтан Саха сирин суруйааччыларын Ассоциацията уонна Амма улууһа Короленко аатынан литературнай уопсастыбаннай бириэмийэни тэрийэргэ быһаарынна. Инникитин өссө манна кыттыһааччылар баар буолуохтара дии саныыбын уонна эрэнэбин. Бу бириэмийэни тэрийии туһунан бүгүн суруйааччы төрөөбүтэ 170 сылыгар анаммыт тэрээһиҥҥэ биллэрдибит уонна күһүн, алтынньы ыйга түмүктүөхпүт. Ол курдук 2022-23 сылларга ханнык нуучча суруйааччыта, эбэтэр тэрилтэ саха сирин, саха норуотун, хоту сир туһунан Арассыыйа таһымыгар таһаарарга көҕүлээбитин, суруйбутун, көмөлөспүтүн бэлиэтиэхпит. Бу бириэмийэ Саха сирин туһунан Арассыыйа билиҥҥи ааҕааччытыгар тириэрдэргэ диэн сыаллаах олохтонно», — диэн Олег Гаврильевич санаатын үллэһиннэ.
