Литературная Якутия


 
20.09.2022
 

Оҕолуу сырдык куттаах Уйулҕаана

Сунтаарга улуустааҕы «Ньургуһун» литературнай түмсүү чилиэнин Розалия Семеновна Николаеваны-Уйулҕаананы мин аҕыйахтык көрсөн, алтыһан аастым.

 

Ол көрсүһүүлэр үксүгэр айар куттаахтар туохха эмэ аналлаах тэрээһиннэрин кытары ситимнээх буолаллар. Хас көрдөҕүм аайы кини миэхэ бэрт сэдэх, кэмчи эмп курдук, сүрэҕи сылытар, сүрэххэ сөҥөр дьикти ураты тыллары булан этэр идэлээх.

Оттон бу күннэргэ «Ньургуһун» литературнай түмсүү тэриллибитэ 50 сылын туолар күнүн бэлиэтиир тэрээһиҥҥэ истиҥник эҕэрдэлээн баран, бэйэтин хараҕын харатын кэриэтэ харыстаан илдьэ сылдьар, араас сылларга оҕолорго анаан бэчээккэ таһаартарбыт түөрт кинигэтин: «Соло буллаххына көрөөр» днэн аахтара биэрбитэ. Кинигэлэр ааттара бу баар:

2011 сыллаахха Дьокуускай куоракка бэчээттэммит «Ойор күннээх оҕо сааһым» (оскуолаҕа үөрэнэр оҕолорго аналлаах) хоһооннор хомуурунньуктара, 2018 сыллаахха «Дани-Алмааска» бэчээттэммит «Оҕо мичээрэ» оҕолорго, улахан дьоҥҥо анаммыг хоһооннор, «Чуопчаарар чыычаахтар» ааҕааччы киэҥ араҥатыгар анаммыт кьграчааннар минньигэс саҥалара, 2020 сыллаахха эмиэ киин куоракка бэчээттэммит «Кырдьаҕастан алгыһын, эдэртэн эйэтин ыл» оҕолорго. улахан дьоҥҥо анаммыт кэпсээннэр, хоһооннор хомуурунньуктара.

Кинигэлэри ылан биир-биир арыйталаан ааҕан көрөбүн. «Ойор күннээх оҕо сааһым» хоһооннор хомуурунньуктарыгар барыта 14 хоһоон киирбит. Хоһооннор бары оҕо имигэс тыла үөрэтэригэр, өйүгэр түһэрэригэр сөптөөх гына таҥыллан, дорҕоон тыаһа биир тэтимҥэ кутуллан иһэргэ дылылар. Ол курдук, «Ийэ» диэн хоһоон маннык истиҥ тыллардаах:

 
«Аан маҥнайгы тылбыт «Ийэ» буолар биһиэнэ.
Истиҥтэн истиҥ киһибит Ийэ буолар биһиэхэ.
Дьикти иэйии илгийэр «Ийэ» диэн тылтан.
Ити тылы иһиттэр, оҕо тута уоскуйар.
«Ийэ» диэн нарын тыл таптыырга үөрэтэр.
Куһаҕантан куоттарар.
Үчүгэйгэ угуттуур».
 
«Саха сирэ», edersaas.ru анаан
Елена АНТОНОВА-Күн Сиккиэрэ

Источник: «Эдэр саас»