Надежда Ильина – Н.Д. Неустроев аатынан бириэмийэ лауреата
Быйыл иккис төгүлүн саха литературатын төрүттээччилэртэн биирдэстэрэ Николай Денисович Неустроев аатынан ыччат литератураҕа бириэмийэтин лауреата ааттанна. Лауреатынан драмалыы айымньыларын иһин драматург, поэт, очеркист Надежда Ильина буолла.
Тэрийэр кэмитиэт иһитиннэрэринэн, кыайыылаахха бириэмийэни ахсынньы 28 күнүгэр П.А. Ойуунускай аатынан Литература судаарыстыбаннай музейыгар Россия Суруйааччыларын сойууһун хос бэрэссэдээтэлэ, норуот суруйааччыта Николай Лугинов, “Саха сирин суруйааччыта” ассоциация бэрэссэдээтэлэ, П.А. Ойуунускай аатынан судаарыстыбаннай бириэмийэ лауреата Олег Сидоров, эдэр суруйааччылары кытары үлэни сүрүнннүүр Россия Суруйааччыларын сойууһун бырабылыанньатын сэкирэтээрэ, “Чолбон” сурунаал бас эрэдээктэрэ Гаврил Андросов, Саха сирин Суруйааччыларын сойууһун бырабылыанньатын чилиэнэ Рустам Каженкин туттардылар.
Норуот суруйааччыта Николай Лугинов: “Саха литературатыгар драма жанрын төрүттээбит Николай Неустроев эдэр сааһыгар олохтон туораабыт буолан, үс төрүттээччи суруйааччыларбытыттан кини аата ситэри ааттаммакка сылдьар”, – диэн бэлиэтээтэ уонна эдэр суруйааччыларга туһаайан: “Классика буолар айымньылары суруйарга кыһаллыҥ!” - диэн алгыс тылын эттэ. Бириэмийэни олохтооччу Олег Сидоров лауреат аатын икки суруйааччы сойуус бэрэссэдээтэллэрэ уонна Литература музейын дириэктэрэ быһааралларын санатан туран: “Бу бириэмийэ Николай Неустроев сырдык аатын үйэтитэр сыаллаах, суруйар дьоҕурдаах эдэр дьону өйүүр соруктаах олохтоммута”, - диэн быһаарда.
Санатар буоллахха, бу бириэмийэ 40-гар диэри саастаах, айар сойууска киирэ илик эдэр литератор икки сыл иһигэр айар үлэтин түмүгүнэн бэриллэр. Былырыын бастакы лауреатынан Үөһээ Бүлүү улууһун Дүллүкү нэһилиэгэр олорор поэт Николай Васильев-Харыйалаах Уола буолбута.
Надежда Ивановна Ильина – 1985 сыллаахха төрөөбүтэ. Мэҥэ Хаҥалас улууһун Тиэлиги нэһилиэгиттэн төрүттээх. Майа гуманитарнай оскуолатын, М.К. Аммосов аатынан Саха судаарыстыбаннай университетын Саха тылын уонна культурологиятын факультетын литература үлэһитэ салаатын, ХИФУ ХИНТуоКИ филологияҕа магистратуратын бүтэрбитэ. Суруналыыһынан, юрист көмөлөһөөччүтүнэн үлэлээбитэ. 2021 сыл от ыйыттан «Чолбон» сурунаал эппиэттээх сэкирэтээрэ.
Драматургияҕа устудьуоннуур кэмиттэн холонор. Драмалыы айымньылара: «Сарсын буолуо» мюзикл-испэктээкил (реж. С. Потапов, «Сэргэлээх уоттара» култуура киинэ, 2005), «Ытыллыбыт ох төннүбэт» пьеса (реж. Д. Охлопков, Дмитрий Ходулов аат. Майатааҕы норуот тыйаатыра, 2018), «Чолбон» сурунаал 95 сылыгар анаммыт уус-уран дьүһүйүү (реж. Егор Ощепков, А.Д. Макарова аат. Саха сиринээҕи культура уонна искусство колледжын устудьуоннара, 2021), о.д.а. Эдэр суруйааччылар өрөспүүбүлүкэтээҕи сүбэ мунньахтарын драма секциятын кыттыылааҕа. Вячеслав Дурненков ыыппыт СӨ Тыйаатыр диэйэтэллэрин тэрийбит драматурдар лабораторияларыгар (2019), Айар маастарыстыба (2021) өрөспүүбүлүкэтээҕи семинардарыгар дьарыктаммыта. Быйыл «Арктика драматурдара» бырайыакка ситиһиилээхтик кытынна, пьесалара «8 пьес – начало. Бесконечность» хомуурунньукка, «Чолбон» сурунаалга бэчээттэннилэр.
