Мээндигигэ Харысхал пааматынньыга арылынна
Саха норуодунай суруйааччыта, драматург, прозаик, ССРС суруйааччыларын сойууһун чилиэнэ, Саха Өрөспүүбүлүкэтин култууратын үтүөлээх үлэһитэ, Амма уонна Хаҥалас улуустарын, Мээндиги уонна Соморсун нэһилиэктэрин бочуоттаах олохтооҕо Василий Егорович Васильев — Харысхал төрөөбүтэ 75 сылын көрсө кини төрөөбүт-үөскээбит түөлбэтигэр Амма улууһун Мээндиги нэһилиэгэр кыһыл көмүс дуйдаах пааматынньыгы үөрүүлээх быһыыга-майгыга астылар. Суруйааччы пааматынньыгын талааннаах скульптор Владимир Левин оҥорбут.
Бэлиэ тэрээһиҥҥэ Харысхал чугас доҕотторо, бииргэ төрөөбүттэрэ, бииргэ үөрэммит кылааһын оҕолоро, кини талааныгар сүгүрүйээччилэр кыттыыны ыллылар. Пааматынньык арыллыытын үөрүүлээх чааһыгар Амма улууһун баһылыгын бастакы солбуйааччы Василий Бураев, Мээндиги нэһилиэгин баһылыга Илья Семенов, Саха Өрөспүүбүлүкэтин Ил Түмэн Судаарыстыбаннай мунньах бэрэссэдээтэлин солбуйааччы Афанасий Владимиров, саха норуодунай суруйааччыта Дмитрий Наумов, Саха тыйаатырын режиссера Руслан Тараховскай, Арассыыйа үтүөлээх артыыската, Саха Өрөспүүбүлүкэтин норуодунай артыыһа Елена Сергеева-Румянцева, Саха тыйаатырыгар литературнай чаас сэбиэдиссэйэ Надежда Ильина, олохтоох кыраайы үөрэтээччи Михаил Алексеев эҕэрдэлээтилэр.
«Үтүө өйдөбүл» диэн төгүрүк остуолга Соморсун баһылыга Алексей Кононов, Саха Өрөспүүбүлүкэтин култуура пааматынньыктарын харыстыыр управление салайааччыта Николай Макаров, Саха Өрөспүүбүлүкэтин Судаарыстыбаннай сулууспа бэтэрээнэ Анастасия Божедонова, Мээндиги нэһилиэгин куратора Роман Алексеев, Саха сирин суруйааччыларын сойууһуттан айар куттаах биир дойдулаахтарбыт Саргылана Гольдерова — Саргы Куо, Зинаида Архипова уонна прозаик Анатолий Слепцов, Мээндиги оскуолатын дириэктэрэ Осип Софронов, бииргэ төрөөбүттэрэ балта Александра Терентьева, быраата Егор Васильев, сиэнэ Дарина Баишева, чугас аймахтара Михаил Жирков уонна Евдокия Бурнашева, бииргэ үөрэммит доҕотторун ааттарыттан Аграфена Парфенова уонна Анна Шишигина истиҥ ахтыылары оҥордулар.
2025 сылга суруйааччы үбүлүөйүн көрсө тэрээһиннэри ыытыыга өрөспүүбүлүкэ таһымнаах хамыыһыйа үлэлиэҕэ. Бэрэссэдээтэл — Афанасий Владимиров — Саха Өрөспүүбүлүкэтин Ил Түмэн Судаарыстыбаннай мунньах бэрэссэдээтэлин солбуйааччы, чилиэннэр: Афанасий Ноев — култуура уонна духуобунай сайдыы миниистирэ, Гаврил Андросов — Саха сирин суруйааччыларын сойууһун бэрэссэдээтэлэ, Анатолий Николаев — Арассыыйа уонна Саха сирин норуодунай артыыһа, Саха тыйаатырын дириэктэрин солбуйааччы уонна Николай Макаров — култуура пааматынньыктарын харыстыыр управление салайааччыта.
Суруйааччы үбүлүөйүн көрсө ханнык тэрээһиннэр былааннаммыттарын билиһиннэрэбит. Мээндиги нэһилиэгэр Харысхал төрүттэрин уһаайбатыгар суруйааччылар дьиэлэрин тутуохтара, «Харысхал Фест» диэн өрөспүүбүлүкэтээҕи суруйааччылар бэстибээллэрэ тэриллиэҕэ, Баһылай Харысхал айымньыларынан мас уустарын өрөспүүбүлүкэтээҕи күөн күрэстэрэ ыытыллыаҕа. Соморсун нэһилиэгэр саҥа тутулла турар норуот айымньытын дьиэтигэр саха норуодунай суруйааччыта Василий Егорович Васильев — Харысхал аатын иҥэриэхтэрэ, итиэннэ кулууп территориятыгар кини пааматынньыгын туруоруохтара. Маны таһынан сыл устата оскуола оҕолоругар Харысхал ааҕыылара, кини айымньыларынан испэктээк көрүүтүн күөн күрэстэрэ, суруйааччы айымньыларын уус-ураннык ааҕыы марафона ыытыллыахтара. Саха Өрөспүүбүлүкэтин Бырабыыталыстыбатын таһымыгар Бүтүн Арассыыйатааҕы научнай-практическай кэмпириэнсийэ тэриллиэҕэ.
