Дьокуускай
Күндүмэҥҥэ уонна Бүлүүйүскэйгэ аналлаах кинигэлэр сүрэхтэннилэр
Бэҕэһээ Сунтаар Кутанатыттан төрүттээх, онно оҕо саастара, айар үлэлэрэ ааспыт, Саха норуотун умнуллубут айар талааннаахтара: краевед, музеевед, фольклорист, тылбаасчыт, суруналыыс, учуутал, Күндэттэн саҕалаан Кутана суруйааччыларын ааҕааччыга иккистээн тыын биэрбит, улахан умнуллубат үтүөлээх Трофим Семенович Кириллин уонна бэйиэт Альберт Бүлүүйүскэйгэ аналлаах кинигэлэри сүрэхтээһин саха театрын Алампа аатынан саалатыгар буолла.
Оруобуна 4 чаастан саҕаламмыт тэрээһин 9 чааска диэри буолла. Киэһээҥҥи да аһылыгы аһардарбыт үтүө тылтан кынаттанан, сэргэхсийэн бириэмэ уһунун да билбэтибит. «Күндү киһибит Күндүмэн» диэн кинигэни Трофим Семенович кэргэнэ, библиотекарь Зоя Григорьевна, учуутал кыргыттара Сайнааралыын, Күндэлиинэлиин хомуйан таһаарбыттар.
Халыҥ, 455 страницалаах, толору сиппит кинигэттэн бэрт элбэх матырыйаалы булуохха сөп дии санаатым. Трофим Семенович айар олоҕун сырдатар түһүмэхтэргэ биир дойдулаахтарын ахтыылара, суруйбут сценарийдара, олоҥхолоро, талыллыбыт ыстатыйалара киирбиттэр. Маны сэргэ Трофим Семенович Кутана тэрээһиниттэн устубут видеоустуулара, кини туһунан биэриилэр кинигэҕэ баарын төлөпүөн нөҥүө анал сыһыарыынан көрүөххэ сөп эбит. Онон инникитин бу кинигэттэн элбэх дьоһуннаах суруйуулары көлүөнэ кылаатын бэлэҕин курдук туһаныахха сөп. Кинигэ сүрэхтэниитигэр Трофим Семенович тэрээһиннэригэр ыытар «Дьикти айан» диэн литвикторинатын ыытыы кэлбит дьон болҕомтотун тарта. Кыттыбыт дьоҥҥо барыларыгар бириис биэрэн, үөрэн кэллибит.
Трофим Семенович Сунтаартан төрүттээх суруйааччылар ааҕааччыларыгар сүппэккэ тыыннаах сылдьалларыгар элбэх үлэни ыыппыта. Ахтан аһарбытым курдук, кини көмөтүнэн Күндэттэн саҕалаан, билиҥҥи көлүөнэ умна быһыытыйбыт суруйааччыларыгар хаттаан тилиннэриигэ элбэх үлэни ыыппыта. Олортон биирдэстэринэн Альберт Бүлүүйүскэйгэ аналлаах дьоһун үйэтитиитэ буолар. Кини хас да сыл ирдэһэн булбут матырыйаалларынан, Бүлүүйүйскэй архивын туһанан, хара бартыбыалтан булуллан «Доҕоттоор, мин сир тыыннаах киһитэбин!» диэн кинигэтин Кутанаттан төрүттээх Анетта Егорова таһаарда.
Бу кинигэҕэ Анетта Бүлүүйүскэй хоһооннорун, тылбаастарын, ырытыытын, күннээҕи суруйуутун барытын таһаарбытынан уратылаах. Анеттаҕа Бүлүүйүскэй туһунан суруйарыгар Зоя Григорьевна харайа,уура сылдьар бартыбыалын туттарбыт. Хата,Аннетата туохтан да толлон, сааран турбакка кинигэ бэлэмнээн, үйэлэргэ умнуллубат өйдөбүнньүгү Альберт Бүлүүйүскэйгэ тутта диэн мээнэҕэ эппэтилэр. Сүрдээх эппиэтинэстээх,кыахтаах кыыспытыттан үөрэбит эрэ. Ити мин ити икки кинигэни бүгүн саҥа ыллым уонна арыйан көрө да илик буоллар, көрсүһүүттэн үөрбүччэ санаабын үллэһинним.
