Короленко хайатыгар суруйааччы төрөөбүтэ 170 сыла киэҥник бэлиэтэннэ
Амма биир кэрэ миэстэтинэн нуучча улуу суруйааччыта Владимир Короленко таптаан сынньаммыт сирэ Хойуодуку хайата буолар. Билигин бу хайаны дьон-сэргэ Короленко хайата диэн ааттыыр. Бүгүн суруйааччы төрөөбүтэ 170 сыла. Манна киэҥ далааһыннаах “Пикник с Короленко” диэн экофестиваль ыытылынна. Тэрээһини Амматааҕы кииннэммит бибилэтиэкэ, Амма улууһун дьаһалтатын ыччат бэлиитикэтигэр уонна социальнай эйгэҕэ управлениета, Амма 1№-дээх В.Г. Короленко аатынан орто оскуолата бииргэ кыттыһан, сүбэлэрин холбоон ыыттылар.
“Былырыын Арассыыйа ыччаты кытта үлэлиир федеральнай Агенствота ыытар Граныгар кыттан экологическай хайысхаҕа кыайбыппыт уонна быйыл өссө Ил Дархан ыччакка анаабыт субсидиятын эмиэ ыламмыт бу тэрээһин үбүлэннэ. Бастаан утаа бу бырайыак экофестиваль эрэ диэн этэ, ол кэннэ библиотека үлэһиттэриттэн этии киирэн улуу суруйааччы Владимир Галактионович Короленко үбүлүөйүн көрсө "Пикник с Короленко" диэн ааттаан тэрийиэххэ диэн буолбута. Онон икки бырайыак холбоһон маннык олус бэрт тэрээһин "төрөөбүтэ. Ол тэрээһиммит табылынна дии саныыбыт. Элбэх киһи кытынна. Оскуола оҕолоро кэлэн эмиэ субуотунньука сылдьан, ыытыллыбыт маастар кылаастарга үөрэнэн астынан бардылар. Аны манна Короленко хайатыгар тиийэргэ урбаанньыт Николай Афанасьев бэйэтэ көҕүлээн кумаҕынан кутан, астаран наһаа үчүгэй суол оҥорбута олус махталлаах. Онтон эдэр туристар станциялара хайаҕа тахсарга бэйэлэрэ сири хаһан кирилиэс курдук оҥорбуттар уонна тутуһар быа тартылар. Онон дьон сылдьарыгар табыгастаах.Инникитин бу бырайыак өссө сайда туруо диэн эрэнэбин”, - диэн улуус ыччат дьыалаларыгар уонна социальнай эйгэҕэ управлениетын салайааччыта Саргылана Неустроева сырдатар.
Улуу суруйааччы төрөөбүт күнүгэр ыытыллыбыт экофестивальга кыттыыны Саха сирин суруйааччыларын Ассоциациятын бэрэссэдээтэлэ, “Илин” сурунаал эрэдээктэрэ, ХИФУ суруналыыстыкаҕа кафедратын сэбиэдиссэйэ, филологическай билим хандьыдаата Олег Сидоров кэргэнинээн ХИФУ доцена Лена Алексеевналыын кыттыыны ыллылар. Тэрээһин кыттыылаахтарын улуус баһылыгын бастакы солбуйааччы Василий Бураев эҕэрдэлээтэ. Маны сэргэ улуус баһылыгын социальнай боппуруостарга солбуйааччы Нюргуяна Илларионова сылдьан, бэстибээл кыттыылаахтарын кытта көрүстэ. Бу күн аҥардас маастар эрэ кылаастар, буолбакка, экологическай хайысхалаах буоларынан Короленко сынньанар сирин саҥардан кырааскалаатылар, бөх хомуйдулар. Ону тэҥэ пикниккэ кэлбит дьонтон ким да пластиковай бытыылканы илдьэ кэлбэтилэр. Фестиваль кыттыылаахтара бибилэтиэкэ тэрийбит "төгүрүк остуолугар" суруйааччы Аммаҕа эрэ буолбакка, саха норуотугар оҥорбут суолтатын, ону сэргэ Короленко аатын үйэтитиигэ үлэлэспит дьон туһунан санааларын эттилэр, ырытыстылар. Ол кэнниттэн Владимир Короленко "Макар түүлэ" кэпсээнин дорҕоонноохтук ааҕыы буолла.
“Бүгүҥҥү күн олус үчүгэйдик ааста. Наһаа астынан, сынньанан баран эрэбит. Элбэх оҕо кэлбитин көрөн үөрдүбүт. Оҕолор кэлэн маастар –кылаастарга кытыннылар, Короленко манна суруйбут “Макар түүлэ” айымньытын дорҕоонноохтук аахтылар. Айар лааҕыр оҕолоро кэлэн эмиэ кыттыбыттара кэрэхсэбиллээх. Владимир Галактионович чахчы да биһиги Аммабыт кэрэ айылҕатын сөбүлээн, таптаан, бу хайаҕа кэлэн сынньанан, элбэх улуу, классика буолбут айымньыларын суруйбута. Инникитин манна билиҥҥи Арассыыйа биллэр суруйааччыларын аҕалан кытыннаран, дойдубутун өссө киэҥ сиргэ ааттата турарга үлэлэһиэхпит”, - диэн биир дойдулаахпыт Олег Сидоров санаатын үллэһиннэ.
