“Саха сирэ” хаһыат, edersaas.ru
Фронтовик-суруйааччылар галереялара арылынна
Бэс ыйын 22-гэр, дойду үрдүнэн биллэриллибит Кутурҕан күнүгэр, Саха сирин Суруйааччыларын сойууһа фронтовик-суруйааччылар мэтириэттэрин галереятын арыйда.
Ярославскай уулуссатыгар турар Суруйааччылар сойуустарын дьиэтин 3-с этээһигэр галереяны үөрүүлээх арыйыыга бырабылыанньа чилиэннэрэ уонна фронтовик-суруйааччылар оҕолоро, сиэннэрэ бары харыстанар ньымалары туттан, кыттыыны ыллылар, кыһыл лиэнтэни быстылар.
Галереяҕа 26 фронтовик мэтириэтэ ыйанна, ааттара көмүс буукубанан сурулунна. Бу бырайыагы суруйааччылар Степан Сивцев-Хамалҕа, Сэмэн Тумат, Баһылай Харысхал сүрүннээбиттэр, өрөспүүбүлүкэтээҕи “Кыайыы” пуондаттан үбүлэммит.
Фронтовик суруйааччылар оҕолоро, сиэннэрэ тэрийээччилэргэ аҕаларын, эһэлэрин ааттарын үйэтиппиттэригэр махтаннылар, астыммыттарын биллэрдилэр, кылгас ахтыы оҥордулар. Кинилэри Суруйааччылар сойуустарын бэрэссэдээтэлэ Наталья Харлампьева истиҥник эҕэрдэлээн, тыл эттэ.
“Төһө да харантыын, хааччахтааһын буоллар, аҕаларбытын кэриэстээн кэллибит”, — диэн ыалдьыттартыл эттилэр, күндү киһилэрин мэтириэтигэр сибэкки дьөрбөтүн уурдулар. Манна бааллар: Эллэй уолаттара Александр Серафимович уонна Иосиф Серафимович, Болот Боотур кыыһа Наталья Васильевна, Бүөтүр Тобуруокап кыыһа Любовь Петровна, күтүөтэ, суруйааччы Миитэрэй Наумов, Макаар Хара кыыһа Земфира Макаровна, Күн Дьирибинэ кыыһа Мария Степановна, Иннокентий Артамонов сиэнэ, Москваттан Юрий Шамшурин сиэнэ, хос сиэнэ, уо.д.а.
— Үүнэр көлүөнэ дьоруойдары хараҕынан көрөн билиэхтээх. Суруйааччылар уруучуканы эрэ буолбакка, саа-саадах тутан, Ийэ дойдуларын көмүскээбиттэрэ. Кинилэр хорсун быһыыларыгар сүгүрүйэн туран, сырдык ааттарын үйэтитэр иэстээхпит. Оҕолоро, сиэннэрэ долгуйбуттарын көрөн, биһиги эмиэ долгуйдубут. Инникитин Кыайыы күнүн көрсө фронтовик-суруйааччылар оҕолорун, сиэннэрин кытта көрсүһүүлэри үгэскэ кубулутуохха диэн санаа киирдэ. Эбии гражданскай сэрии кыттыылаахтарын: Былатыан Ойуунускай, Эрилик Эристиин, Күн Дьирибинэ, Степан Ефреомв, Таллан Бүрэ, уо.д.а. мэтириэттэрин ыйыыр былааннаахпыт, — диэн сойуус бэрэссэдээтэлин солбуйааччы Степан Сивцев-Хамалҕа кэпсээтэ.
Кыайыы 75 сылыгар Саха сирин Суруйааччыларын сойууһа Болот Боотур хаһан да бэчээттэнэ илик “Саллааттар этибит” поэмата кинигэ буолан тахсарыгар үлэлэстэ. Горнай улууһуттан “Кыһыл Сулус” уордьаннаах лейтенант Николай Николаев “Уһаарыллыы” сэһэнэ соһуччу көстөн, “Чолбон” сурунаал 3 кэнники нүөмэригэр бэчээттэннэ. Сотору кинигэ буолан тахсыахтаах. “Чолбон” 5-с нүөмэригэр фронтовик-суруйааччылар айымньылара антология курдук бэчээттэннэ.
