«Саха сирэ»
«Бор көмүс күһүнүгэр» сырыттыбыт
Балаҕан ыйын 9 күнүгэр «Бор көмүс күһүнүгэр» Саха сирин Автономията төрүттэммитэ 100 сылыгар, Семен Данилов төрөөбүтэ — 105, Софрон Данилов төрөөбүтэ 100 сылларыгар ананан ыытыллыбыт литературнай бэстибээл үрдүк таһымҥа ааста.
«Айар Кут» түмсүү чилиэннэрэ аҕыйах буолан «Иэйии» түмсүүгэ кыттыһан ситиһиилээхтик кыттан кэллибит. Бу тэрээһини тэрийбит «Сыккыс» литературнай түмсүүгэ (салайааччы Айталина Николаевнаҕа) улахан махталбытын тиэрдэбит.
Манна литературнай түмсүүлэр эрэ буолбакка үҥкүү, хоһоон куруһуоктарыттан элбэх эдэр ыччат кэлэн, күргүөминэн оҥостон атрибуттаах испэктээк хабааннаах инсценировкалары көрдөрдүлэр.
«Бор көмүс күһүнэ» бэстибээл Мытаах нэһилиэгин «Үс Көлүйэ» сайылыгын таһынааҕы айан суолугар, саха норуодунай бэйиэтэ Семен Данилов норуокка биллэр «Ферма кыргыттара» ырыатыгар Өйдөбүнньүк бэлиэни туруорууттан саҕаланна.
Манна Сунтаартан ыҥырыллан кэлбит, Сэмэн Данилов хоһоонун ырыа гынан көтүппүт Иван Степанович Иванов бэйэтэ матыыптаабыт «Ферма кыргыттара» ырыатын ыллаан бэлэхтээтэ. С.Данилов хоһоонугар ырыаҕа киирбит ьиэс бэһиэлэй кыргыттар — дьоруойдар дьылҕаларын Мытаахтааҕы мусуой-галерея дириэктэр Артур Николаевич Егоров сиһилии кэпсээтэ.
Эдэр ыччакка хоһоон күрэҕэ ыытылынна. Дьүүллүүр сүбэҕэ Саха сирин Суруйааччыларын сойууһун чилиэннэрэ Сэмэн Попов-Тумат, Анна Егоровна Варламова-Айысхаана үлэлээтилэр.Ону таһынан, суруйааччылары кытта төгүрүк остуол тула олус истиҥ ирэ-хоро кэпсэтии, сэргэх көрсүһүү буолан ааста. Манна бааллар: суруйааччылар Елена Слепцова-Куорсуннаах, Сэмэн Попов-Тумат, Анна Варламова-Айысхаана, элбэх ырыа ааптара Сэмэн Капитонов.
Сэргэх тэрээһинтэн бириистээх туоһу суругу тутан, санаабыт көтөҕүллэн, инникитин маннык тэрээһиннэргэ түмсүүттэн элбэх чилиэн кыттыылаах, эрдэттэн эрчиллэн тиийиэхпит диэн эрэллээх кэллибит.
«Сыккыс» литературнай түмсүү салайааччыта Айталина Николаевна тэрийбит Гранатовай бэстибээлэ улахан инникилээх! Бэстибээл элбэх чаҕылхай айдарыылаах көлүөнэни тарта. Ити тахсан иһэр ыччаттар саха тыла сайдарын, сахалыы айымньылары ааҕалларын, эдэр көлүөнэ үүнэ сайда турарын көрдөрдүлэр.
Онтон биһиги, саастаах хоһоонньуттар, эдэр ыччаты көҕүлүү уонна тэрийээччилэри өйүү диэн санаалаах тиийбиппит.
Наҕараадалар эдэр талааннаахтарга — үүнэр көлүөнэҕэ тиксибитэ үөрдэр эрэ. Кыттыыны ылбыт «Айар Кут» түмсүү чилиэннэригэр: Валентина Иннокентьевнаҕа, Прасковья Алексеевнаҕа, Александра Васильевнаҕа уонна көхтөөх айаҥҥа бары ырыа-үөрүү кынаттаах аргыстарбытыгар, барыбытын тэбис-тэҥҥэ илдьэ сылдьыбыт «Иэйии» түмсүү салайааччыта Илья Ильич-Алмааска, айаны, күрэҕи салайбыт Саргылана-Сайыҥҥа, Санаараҕа махталбытын тиэрдэбит!
Инникитин да маннык холбоһуктаах тэрээһиннэр буола турдуннар.
