Бэйиэт Гаврил Андросов «Северная звезда» куонкурус кыайыылааҕынан таҕыста
“Север” Арассыыйатааҕы литература сурунаала сылын аайы ыытар куонкуруһугар Саха сириттэн бэйиэт Гаврил Андросов кыайыыны ситистэ. Быйыл куонкурус уон иккис төгүлүн ыытылынна.
Быйылгы куонкуруска Арассыыйа үгүс эрэгийиэниттэн, тас дойдулартан барыта сүүстэн тахса киһи кыттыбыт. Дьүүллүүр сүбэ үлэлэри үс хайысхаҕа арааран көрдө. Ол курдук, поэзияҕа, прозаҕа, публицистикаҕа үлэлэр туспа сыаналаннылар. Поэзияҕа саха бэйиэтэ, “Чолбон” литература сурунаалын эрэдээктэрэ Гаврил Андросов лауреат үрдүк аатын ылла.
“Север” литература сурунаала 1940 сыллаахха төрүттэммитэ. 1956 сылтан саҕалаан Архангельскай, Вологодскай, Мурманскай, Новгородскай уобаластары, Карелияны, Комины түмэн тахсар буолбута. Оттон 1991 сылтан Карелия Өрөспүүбүлүкэтин уонна Арассыыйа суруйааччыларын сойууһун сурунаалын быһыытынан бэчээттэнэр.
Сурунаал 2009 сылтан саҕалаан “Северная звезда” диэн эдэр бэйиэттэргэ, суруйааччыларга анаан куонкурус ыытар. Бу куонкуруска 15 саастарыттан 37 саастарыгар диэри суруйар талааннаах дьон кыттыахтарын сөп. Кыайыылаахтар “Север” сурунаалга анал рубриканан тахсар, Москваҕа Максим Горькай аатынан Литература института ыытар айар сэминээрдэригэр уонна Арассыыйатааҕы эдэр суруйааччылар пуорумнарыгар кыттар кыаҕы ылаллар.
