Баһылай Харысхал үбүлүөйдээх сааһын бэлиэтииргэ тэрээһин мунньах ыытылынна
Амма улууһун аактабай саалатыгар норуот суруйааччыта Василий Егорович Васильев – Баһылай Харысхал төрөөбүтэ 75 сылын бэлиэтииргэ бэлэмнэнэр бастакы тэрээһин мунньаҕа буолан ааста.
Мунньаҕы СӨ култуураҕа уонна духуобунай сайдыыга миниистирин бастакы солбуйааччы Мария Турантаева салайан ыытта. Манна куйаар ситимин нөҥүө Ил Дархан сүбэһитэ Андрей Борисов, СӨ суруйааччыларын Ассоциациятын бэрэссэдээтэлэ Олег Сидоров, “Чолбон” сурунаал бас эрэдээктэрэ Гаврил Андросов, суруйааччы төрөппүт кыыһа Ньургуйаана Шишигина, Мээндиги нэһилиэгин баһылыга Илья Семенов, Соморсун нэһилиэгин баһылыга Алексей Кононов, СӨ култуурунай нэһилиэстибэтин эбийиэктэрин харыстыыр Управление салайааччыта Николай Макаров, ону сэргэ Амма улууһун баһылыга Степан Кузьмин, улуус дьокутааттарын Сэбиэтин бэрэссэдээтэлэ Владимир Колосов, улуус баһылыгын социальнай боппуруостарга солбуйааччы Ньургуйаана Илларионова, Василий Егорович балта Александра Терентьева, Соморсун нэһилиэгин баһылыгын солбуйааччы Надежда Белолюбская кыттыыны ыллылар уонна санааларын эттилэр.
“Биһиги аммалар эрэ буолбакка, бүтүн өрөспүүбүлүкэ ытыктыыр, киэн туттар киһибит Василий Егорович Васильев – Баһылай Харысхал быйыл сэтинньи 6 күнүгэр баара буоллар 75 сааһын өрөгөйдөөн туран бэлиэтиэ этэ. Ол гынан баран дьылҕа хаан ыйааҕынан Василий Егоровичпыт бу сиртэн барбыта быйыл үһүс сыла буолар. Кини төһө да суох буоллар биһиги үбүлүөйдээх сааһын киэҥник бэлиэтиэхтээхпит. Биһиги этиибитин Ил Дархаммыт өйөөн, дьаһал тахсан, өрөспүүбүлүкэ таһымнаах хамыыһыйа тэриллэн бигэргэниэхтээх. Биһиги бу мунньахха наһаа үчүгэй этиилэри иһиттибит. Харысхал ыкса доҕоро, бииргэ алтыһан элбэх испэктээхтэри туруорбут режиссера Андрей Саввич Борисов бары өттүнэн көмө буоларын эттэ. Маны сэргэ мунньахха улахан сүрүн тэрээһиннэрбитин чуолкайдастыбыт. Ол курдук Соморсуҥҥа Харысхалга аннаммыт ыһыах ыытыллыахтаах, дьоҕус түмэл тэриллиэхтээх, суруйааччылар кыттыылаах “Харысхал фест” былааннанар. Ону тэҥэ элбэх үйэтитиллэр үлэлэр барыахтаахтар. Өрөспүүбүлүкэ култуурунай нэһилиэстибэтин харыстыыр Управление салайааччыта Николай Афанасьевич Макаров Харысхал архыыбын чөкөтөргө, ону сэргэ дьоҕус түмэли тэрийиигэ Ярославскай аатынан түмэл быһаччы сүрүннүүрэ наадатын, ону кытта тэриллиннэҕинэ хайаатар да попечителлээх буолуохтааҕын, онно кини попечитель буоларга бэлэмин биллэрбитин биһиги олус үөрэ иһиттибит. Онон Харысхалбыт үбүлүөйүн тэрээһиннээхтик ыытарга үлэбит саҕаланна”, — диэн Ньургуйаана Ивановна сырдатта.
Түмүккэ улуус баһылыга Степан Кузьмин былааннары чопчулуурга туһааннаах министиэристибэлэр кыттыылаах, өрөспүүбүлүкэ хамыыһыйатын салайыахтаах, СӨ Бырабыыталыстыбатын бэрэссэдээтэлин солбуйааччы Сергей Местников таһымыгар ыам ыйын бүтүүтэ тэрээһин мунньаҕы ыытарга этии киллэрдэ.
