Баһылай Харысхал музейнай экспозицията арылынна
Бэс ыйын 25 күнүгэр Амма улууһун Соморсун нэһилиэгэр саха норуодунай суруйааччыта, Духуобунас академига, драматург, прозаик, документалист-суруйааччы, публицист уопсастыбаннай деятель Василий Егорович Васильев — Харысхал төрөөбүтэ 75 сылын көрсө олоҕун, айар, чинчийэр үлэтин сырдатар музейнай экспозиция үөрүүлээх быһыыга арылынна.
Экспозицияҕа Баһылай Харысхал тус малларын, кинигэлэрин, суруйбут-үлэлээбит остуолун, олоҕун кэрчиктэрин хаартыскаларга, рукописьтарын, архивнай докумуоннарын көрүөххэ сөп, ону таһынан П.А. Ойуунускай аатынан Саха академическай театрга турбут “Эргиллиэм хайаан да” испэктээкилин сүрүн оруоллар көстүүмнэрэ турдулар.
Музейга сүрүн миэстэни суруйааччы төрөппүттэриттэн хаалбыт ыскааба уонна Мээндигитээҕи дьиэтигэр олоҕун тиһэх күнүгэр диэри айбыт-суруйбут остуола ылар.
Василий Егорович Харысхал, аҕа көлүөнэ саха суруйааччыларын үгүстэрин кытта бииргэ алтыспыт, доҕордоспут, кинилэртэн элбэххэ үөрэммит, алгыстарын ылбыт айар үлэһит этэ. Биир идэлээхтэрэ-суруйааччылар кэпсииллэринэн саха норуодунай суруйааччыта Софрон Данилов драматургияҕа саха литературатын кэскилин чуолаан Харысхалга көрөрө диэн.
«Эргиллиэм хайаан да», «Көмүөл», «Бастыҥ хатыыта», «Тэпсиллибэт үтүө аат», «Учуутал»,«Кэт Мардсден. Үтүө санаа аанньала»… мантан да атын Василий Егорович Харысхал суруйан хаалларбыт пьесаларын көрбөтөх киһи аҕыйах буолуо. Кини хас биирдии испэктээгэ куруутун сааланы тобус-толору көрөөччүнү түмэр. Василий Егорович саха суруйааччыларыттан биир бастакынан история «үрүҥ бээтинэлэрин» хаһыспыта. Саха бастакы интэллигиэннэрин Василий Никифоров – Күлүмнүүрү, Хаҥалас Ксенофонтовтарын, Гавриил Никифоров – Манньыаттаах Уолун, Амма улууһун бастакы кулубатын Асклипиодот Рязанскайы, о.д.а. дьоннор суолларын-иистэрин ирдэһэн араас омук дойдулар архыыптарыгар үлэлээбитэ.
