АРАССЫЫЙАТААҔЫ ЛИТЕРАТУРНАЙ БИРИЭМИЙЭ ЛАУРЕАТА — ИРАИДА КОРКИНА-ЧУГДААРА
Чурапчы улууһуттан төрүттээх эдэр ааптар, «Айар аартыкпыт аргыстара» суруйарга холонор ыччат түмсүүтүн чилиэнэ Ираида Коркина-Чугдаара “Сиэрдээх Арассыыйа” литературнай бириэмийэтин лауреата буолла.
Муус устар 23 күнүгэр Москва куоракка «Сиэрдээх Арассыыйа» баартыйа быйыл алтыс сылын литературнай бириэмийэтин дьоро чааһа 1780-с сыллардаахха тутуллубут эриэккэс көстүүлээх, классика истииллээх аатырбыт «Дом Пашкова» диэн дыбарыаска буолан ааста. Манна Арассыыйа араас регионнарыттан бириэмийэҕэ тиксибит эдэр суруйааччылары, проза, поэзия уонна публицистика жанрыгар кыайыылаахтары чиэстээтилэр. Ираида прозаҕа «Разорванная нить» диэн кэпсээнинэн («Быстыбыт ситим» кэпсээн тылбааһынан) кыттыбыт. Хас биирдии жанрга хас даҕаны лауреат уонна үс кыайыылаах аатын биллэрбиттэриттэн, Ираида Коркина лауреат аатын ылары ситистэ. Санатан эттэххэ “Быстыбат ситим” кэпсээн Эдэр саас сайтыгар тахсыбыта.
Ираида үөрүүлээх сонунун долгуйа үллэстэр:
«Олус долгутуулаах, үрдүк таһымнаах тэрээһиҥҥэ кыттыбыппыттан, буолаары буолан лауреат буолбуппуттан дьоллоннум. Үйэбэр маҥнайгыбын маннык күрэххэ кытынным. Тэрээһин буолуон минньигэс астаах фуршет уонна сэдэх көстүүлээх кинигэ экземплярдарын кытта билсиһии экскурсията буолбута. Литературнай бириэмийэ үөрүүлээх чааһыгар биллэр-көстөр дьон кыттыыны ылбыттара, эҕэрдэ тыл эппиттэрэ. Ол курдук, «Справедливая Партия» лидерэ Сергей Михайлович Миронов, Арассыыйа үтүөлээх артыыһа, киинэ артыыһа, суруйааччы Владимир Конкин, Госдуума депутата Елена Драпека, партия президиумун чилиэнэ Руслан Татаринов уо.д.а. Бу күн олус долгуйан уонна бириэмэтэ ыгым даҕаны буолар соччо кимниин даҕаны чугастык билсибэтим, ол эрэн дьон бары миигинниин бэйэлэрэ ыҥыран туран хаартыскаҕа түстүлэр, сорох «наһаа кыраһыабайгын» диэн комплимент биэрдэ. Бэйэм бу күн сахалыы маҥан халадаайбын, илин кэбиһэрбин кэтэн барбытым. Хаһан даҕаны маннык болҕомтоҕо тиксибэтэх буоламмын долгуйбутум олус биллэр быһыылаах этэ. Биир Арассыыйатааҕы литературнай сурунаал эрэдээктэрэ визиткатын биэрэ туран: «Саха сириттэн эдэр суруйааччылар айымньыларгытын ыытар буолуҥ», — диэтэ. Маны таһынан Сергей Мироновтыын, Драпекалыын алтыһан кэпсэппиппиттэн үөрэбин. Владимир Конкин кинилиин хаартыскаҕа түспүппүн кэннэ: «У вас замечательный рассказ, есть потенциал, отличное начало, дерзайте, желаю дальнейших успехов», — диэтэ. Кини дьүүллүүр сүбэ чилиэннэриттэн биирдэстэрэ этэ. Уопсайынан, суруйар ыччаты бу курдук күрэхтэргэ харса суох кыттан иһин диэн ыҥырабын».
