АММАҔА «КҮН АЙЫЫ СУОЛДЬУТА» СЭМЭН-СҮРГЭН КИНИГЭТИН ОНЛАЙН ЭРЭСИИМҤЭ СҮРЭХТЭЭТИЛЭР
Амма улууһугар Бүтүн Арассыыйатааҕы библиотека күнүнэн улуустааҕы кииннэммит В.М.Новиков – Күннүк Уурастыырап аатынан библиотека үгүс тэрээһиннэри ыытта. Онтон биир түгэнинэн РФ суруналыыстарын Союһун чилиэнэ, СӨ бастакы Президенэ М.Е.Николаев фондатын «Наукаҕа уонна духуобунаска үтүөлэрин иһин» мэтээл хаһаайына, СӨ суруйааччыларын союһун чилиэнэ, Амма улууһун Амма, Мэҥэ Хаҥалас улууһун Алтан нэһилиэгин бочуоттаах олохтооҕо, бэйиэт Сэмэн Слепцов – Сүргэн олоҕун, айан, суруйан хаалларбыт үлэтин туһунан кэпсиир кинигэни сүрэхтээһин буолла.
“Амма олоҕо” хаһыакка өр сыл устата эппиэттиир сэкирэтээринэн үлэлээбит, биһиги дьиэ кэргэн амарах аҕатын Сэмэн Уйбаанабыс Слепцовка анаммыт кинигэ тула кэпсэтии дьиэҕэ олоруу эрэсиимэ буоларынан, онлайн зум платформанан ыытылынна. Кинигэ сүрэхтэниитин кыраайы үөрэтии отделын сүрүн библиотекара, СӨ культуратын туйгуна, Амма улууһун Амма нэһилиэгин бочуоттаах олохтооҕо Вероника Стручкова ыытта. Онтон интэриниэтинэн ситими библиотека программиһа Афанасий Кузьмин иилээтэ.
Тэрээһиҥҥэ Сэмэн – Сүргэн доҕотторо, балта, биир идэлээхтэрэ, куйаар ситиминэн Дьокуускай куораттан, Мэҥэ Хаҥалас улууһун Майатыттан, Өлөчөйүттэн бииргэ буолан кинигэ туһунан, доҕордорун ахтан истиҥ ахтыы буолла. Ол курдук, “Амма олоҕо” хаһыат эрэдээктэрэ Наталья Бубякина, эппиэттиир сэкирэтээрэ, кинигэни хомуйан таһааттарбыт Сэмэн үөрэнээччитэ Вера Иванова, Саха сирин суруйааччыларын ассоциациятын бэрэссэдээтэлэ, «Илин» сурунаал редактора, СӨ духуобунаска академиятын академига Олег Сидоров, оскуолаҕа бииргэ үөрэммит доҕоро, Арассыыйа ЫБМ бэтэрээнэ, Мэҥэ Хаҥалас улууһун биир кэлим дьуһуурунай сулууспа начальнига, ЫБМ хамыһыыйатын бэрэссэдээтэлин солбуйааччыта, муниципальнай сулууспа туйгуна, Майа сэлиэнньэтин олохтооҕо Егор Матчитов, Дьокуускайтан СӨ култууратын үтүөлээх үлэһитэ, СӨ Суруйааччыларын сойууһун бэрэссэдээтэлин солбуйааччы, «Полярная звезда» уус-уран литературнай сурунаал кылаабынай редактора Владислав Доллонов, В.П.Ларионов аатынан орто оскуола учуутала, СӨ үөрэҕириитин туйгуна, Майа олохтооҕо, Сүргэн бииргэ төрөөбүт балта Анастасия Слепцова, доҕоро, Арассыыйа суруйааччыларын союһун чилиэнэ, Амма улууһун бочуоттаах олохтооҕо, бэйиэт Семен Капитонов кыттыыны ыллылар.
Биһиги Слепцовтар ыал тапталлаах кэргэним, аҕабыт, эһээбит аата үйэтитиллибит кинигэ тахсан үөрүүбүт улахан. Кинигэ тахсыытыгар үгүс киһи ахтыы биэрэн үлэбит үчүгэй түмүктээх буолла, санаабытыгар да көрбөтөх кинигэбит күн сирин көрдө. Кэргэним алтыһан ааспыт дьонугар үтүө сыһыаннаах, киһи киһитэ буолан дьоно-сэргэтэ үтүө өйдөбүллээх буоланнар дьоһун кинигэ таҕыста.
Кинигэни бэлэмнээн таһаарбыт хаһыат эппиэттиир сэкирэтээригэр Вера Ивановаҕа, корректор Светлана Федороваҕа, компьютерщик Максим Харитоновка, компьютерга ахтыылары бэчээттээбит Наталья Устиноваҕа, ахтыылары редакциялаабыт убайбытыгар Михаил Егорович Слепцовка, ахтыы суруйан ыыппыт дойдутун дьонугар, баһылык Николай Николаевич Тимофеевка, бииргэ үөрэммит, олоҕор алтыһан ааспыт доҕотторугар, бииргэ төрөөбүттэригэр, аймахтарыгар, спонсордарга махталбытын тиэрдэбит. Доҕоро Алексей Эверстов «Бичик» кинигэ кыһатын кытта кэпсэтэн, спонсордаан, суол хаалаары турдаҕына тиэйэн таһааран улахан көмөнү оҥорон махталбыт улахан. Түмүкпэр, бар дьоммор үтүөнү үксэтэ, үөрүүнү элбэтэ, чэгиэн-чэбдик, ситиһиилээх, дьоллоох буолуҥ диэн алгыыбын.
Сэмэн-Сүргэн кэргэнэ.
«Амма олоҕо» хаhыат
