Аммабыт улууһа ыар сүтүктэннэ...
ЫТЫК АҔА Иван Никитич Корякин-Уйбаан Бөтүүнүскэй Амма улууһун уонна Бөтүҥ нэһилиэгин Бочуоттаах олохтооҕо күн сириттэн күрэннэ.
Олоҕун дьоһуннаахтык олорбут саханы ахтан ылар оруннаах, Иван Никитич үлэтин түмүгүнэн ситиһиилэрэ сүҥкэн этэ, ол курдук РФ суруналыыстарын уонна СӨ суруйааччылар сойуустарын чилиэнэ, Саха сирин суруналыыстарын сойууһун «Кыһыл көмүс бөрүө» лауреатынан, СӨ Бочуоттаах бэтэрээнэ, «СӨ Тыа хаһаайыстыбатын туйгуна», «СӨ Бэчээтин туйгуна», «Сэбиэскэй эргиэн туйгуна» бэлиэлэринэн айымньылаах үлэлэрэ сыаналаммыттара.
Элбэх ымыы оҕолоох ыал Аҕата күнүстэри үлэлээн түбүгүрэрэ эргиэн-атыы эйгэтигэр, АммА редакциятыгар, быыс буллар, бириэмэ таҕыстар эрэ айымньыга умсара, айара-тутара, ол түмүгүнэн элбэх кинигэ ааптардарынан биллэрэ, Улууһун, нэһилиэгин историятын кинигэлэрин таҥара, бэйэтин кэмнээҕи АммАбыт колхоз чулуу үлэһиттэрин, совхоз хоһуун дьонун сурукка-бичиккэ тиһэн үйэтитэрэ, албаннаахтык аатырдара, билэрэ дириҥэ, көрөрө киэҥэ сөхтөрөрө.
Орто дойду аналынан ымыы оҕолорун сайдыыга салайан, сөптөөхтүк иитэн Өрөспүүбүлүкэҕэ, улууска ааттаах-суоллаах үлэһиттэринэн биллэллэр, Иван Никитич элэккэй эһээ, хос эһээ амтанын билбит Күн көмүс киһибит Саха сирин "ЫТЫК АҔА" аатынан бэлиэтэммитэ элбэҕи этэр, кэрэни кэпсиир. АммАлары Айхаллаабыт, Бөтүҥнэрин биһирээбит, Таптал ааты ылынан, дойдуну ытыктыырга үөрэппит Күн көмүс киһибитигэр Махтанабыт.
Уйбаан Бөтүүнүскэй курдук патриотическай өйдөөх-санаалаах, тапталлаах дойдугар бэриниилээх Саха куруук үтүө холобур буолуоҕа барыбытыгар.
Үйэ-саас тухары көмүс сурукка тиһиллэн норуотуҥ өйүгэр-санаатыгар өрүү тыыннаах буолуоҕа, тапталлаах Бөтүҥүгэр төрөөн, халбаҥнаабакка биир сиргэ олохсуйан, олоҕу уһансан, айан-тутан төрөөбүт түөлбэтиттэн Өбүгэлэригэр айаннаатаҕа..., *быдан дьылларга бырастыы быраһаай, Уйбаан Бөтүүнүскэй*, сылаастык саныахпыт, амарахтык ахтыахпыт Аҕабытын, Эһээбитин, Убайбытын...
