Литературная Якутия


 
04.08.2020
 

Бүгүн — норуодунай бэйиэт Моисей Ефимов төрөөбүтэ 93 сыла

Бу күн, атырдьах ыйын 4 күнүгэр, 1927 сыллаахха Саха Өрөспүүбүлүкэтин норуодунай поэта Моисей Дмитриевич Ефимов Дьааҥы улууһугар төрөөбүтэ.

 

1953 с. Дьокуускайдааҕы пединсти­туту бутэрэн, «Эдэр коммунист» хаһыат отделын сэбиэдиссэйинэн үлэтин саҕалаабыта. «Кыым», «Хотугу сулус» редакцияларыгар, орто оскуолаҕа учууталынан үлэлээбитэ. 1963 сылтан 1983 сылга диэри Саха сирин суруйааччыларын сойууһун бырабылыанньатын эппиэттиир сэкирэтээринэн, бэрэссэдээтэлин солбуйааччынан үлэлээбитэ. 1991 с. СӨ суруйааччыларын сойууһун исполкомун бэрэссэдээтэлэ, СР духуобунаска академиятын учуонай сэкирэтээрэ.

М.Д.Ефимов хоһоонноро 40-с сыллар бүтүүлэриттэн бэчээттэнэн барбыттара. «Киирбэт күннээх дойдуга» бастакы кинигэтэ 1954 с. бэчээттэммитэ.

Сахалыы уонна нууччалыы тахсыбыт 40-тан тахса кинигэ ааптара. Бэйиэт быһыытынан гражданскай уонна интимнэй лиирикэҕэ күүстээх. Кини тылларыгар киэҥник ылланар ырыалар айыллыбыттара. Оҕо литературатыгар уонна сатираҕа ситиһиилэрдээх. Историческай хабааннаах айымньылары эмиэ суруйар. Сорох кинигэлэрэ атын омук тылларыгар тылбаастаммыттара.

Моисей Ефимов — биллэр тылбаасчыт. Кини М.Горькай, Н.Некрасов, С.Маршак, С.Щипачев уо.д.а. нуучча суруйааччыларын айымньыларын сахалыы саҥардыбыта. Казахстан, Киргизия уонна хотугу норуоттар хоһооннорун тылбаастаабыта.

М.Д.Ефимов 1957 с. ССРС, 1991 с. СӨ суру­йааччыларын сойууһун чилиэнэ.

Үлэ Кыһыл Знамята уордьанынан, элбэх мэтээллэринэн наҕараадаламмыта. Саха хомсомуолун бириэмийэтин лауреата, СӨ култууратын үтүөлээх үлэһитэ, Казахстан «Алаш» литературнай бириэмийэтин лауреата.

Источник: «Эдэр саас»