«Чолбон» сурунаал «Бастакы эрэдээктэр бириэмийэтин» лауреаттара ааттаннылар
«Чолбон» уус-уран литература сурунаала уонна Таатта улууһун Дьохсоҕон нэһилиэгин дьаһалтата сылын ахсын бастыҥнары бэлиэтиирэ үгэскэ кубулуйда.
Олунньу 15 күнүгэр А.И. Софронов аатынан «БАСТАКЫ ЭРЭДЭЭКТЭР БИРИЭМИЙЭТИН» үөрүүлээх быһыыга-майгыга туттарыы буолла.
ПРОЗАҔА Россия суруйааччыларын сойууhун чилиэнэ Петр Егорович Самсонов-Бүөтүр Хара ылла. Кини Гражданскай сэриигэ үрүҥнэр уонна кыhыллар хатыйсыыларын дибдиргэнин билиhиннэрэр «Тоҥустуур аартыгар» сэhэнин иhин бэлиэтэннэ.
ПОЭЗИЯҔА норуот поэта Наталья Ивановна Харлампьева үбүлүөйдээх сылыгар тахсыбыт «Сырдык ыраҥ ыйдаҥарарын тухары…» хоhоон бөлөҕүн иhин лауреатынан ааттанна.
Быйыл олохтоммут КЫРААЙЫ ҮӨРЭТИИ анал ааты СӨ үөрэҕин үтүөлээх үлэһитэ, кыраайы үөрэтээччи Татьяна Игнатьевна Андросова (Дьокуускай куорат) уонна СӨ культуратын үтүөлээх үлэhитэ, кыраайы үөрэтээччи Розалия Тимофеевна Дягилева (Өймөкөөн улууhа) үллэһиннилэр.
Татьяна Игнатьевна үйэтин-сааһын тухары үүнэр көлүөнэ ыччакка билиини-көрүүнү тарҕаппыт киһи, Сахабыт сирин историятын арыллыбатах өрүттэрин, киэҥ эйгэҕэ биллибэтэх үтүө ааттарын дьоҥҥо-сэргэҕэ тиэрдэр. «Максим Аммосов Байаҕантай улууһугар сырыыта», «Никольскайдааҕы сэрии кыттыылааҕа» (норуодунай армия Хотугу этэрээтигэр эмчитинэн сулууспалаабыт саха хоһуун дьахтара Лидия Гаврильевна Слепцова туһунан) ыстатыйалар Саха АССР 100 сыллаах историятын чахчыларын сэгэттилэр. Өймөкөөн кыраайы үөрэтээччитэ Розалия Дягилева «Өймөкөөн үрүҥ уонна кыhыл будулҕаныгар» ыстатыйатыгар Саха сирин гражданскай сэриитин биир кэрчигин туһунан историктар да билбэт чахчыларын булан, хорутуулаахтык суруйбута.
Бириэмийэлэри туттарыыны “Чолбон” сурунаал бас эрэдээктэрэ Гаврил Андросов иилээн-саҕалаан ыытта, лауреаттары «Сахабэчээт» СӨ судаарыстыба автономиялаах тэрилтэтин генеральнай дириэктэрэ Ньургуйаана Стручкова эҕэрдэлээтэ. Дьохсоҕон нэһилиэгин баһылыга Петр Захаров лауреаттарга анаан видео нөҥүө саха тылын, бэчээтин, литературатын сайыннарааччылар үтүө баҕа санаатын тиэртэ.
Түмүккэ наҕараадаламмыттар санааларын үллэhиннилэр.
Норуот поэта Наталья Харлампьева 2025 сылга саха суругунан уус-уран литературата 125 сылын көрсө “Чолбон сэмсэтэ” сыhыарыы сөргүтүллэригэр баҕа санаатын биллэрдэ.
Кыраайы үөрэтээччи ытык кырдьаҕастар Татьяна Андросова уонна Розалия Дягилева бириэмийэҕэ тиксибиттэриттэн үөрэн, махтанан, сурунаалга бастыҥ баҕа санааларын эттилэр.
«Чолбон» сурунаал редколлегиятын чилиэнэ, норуот суруйааччыта Сэмэн Тумат наҕараадаламмыттарга саха литературатын атаҕар туруорсубут “Чолбон” сурунаал «Бастакы эрэдээктэрин бириэмийэтин» ылбыттарынан эҕэрдэлээтэ. Кыраайы үөрэтээччилэр, суолталара урукку кэмтэн ытыгыланарын тоhоҕолоон эттэ. Ханнык баҕарар омук историятын тирэнэр тирэҕинэн олохтоох кыраайы үөрэтээччилэр үлэлэрэ буоларын санатта. «Саха үтүө үлэhит дьоно үчүгэйгэ тигистэҕинэ, саха үөрэр айылҕалаах. Ол сиэринэн барыгытын ис сүрэхтэн эҕэрдэлиибин!”, — диэн алгыстаах эҕэрдэтин тиэртэ.
