«Чолбон» – «Саха сирин бэчээтин тиэргэнин» бастыҥ сурунаала
Быйылгы «Саха сирин бэчээтин тиэргэнэ» регионнар икки ардыларынааҕы быыстапка-дьаарбаҥкаҕа «Чолбон» уус-уран литература сурунаала «Бастыҥ периодика таһаарыытынан» ааттанна.
Санатар буоллахха, тэрээһин атырдьах ыйын 26-27 күннэригэр Саха сирин киин куоратыгар Дьокуускайга буолан ааста. Быыстапка-дьаарбаҥкаҕа Казахстантан «Фолиант» кинигэ кыһата, Москва куорат кинигэ таһаарааччылара кэлэн кытыннылар. Күрэскэ кэтэхтэн кыттааччы өссө элбэх – Татарстан, Башкортостан, Кавказ, киин Россия уонна Сибиир бэчээт эйгэтигэр үлэлиир тэрилтэлэрин оҥоһуктара бааллар. Ол курдук, дьүүллүүр сүбэ уон номинацияҕа 200-тэн тахса үлэни сыаналаата.
Гаврил Андросов, «Чолбон» сурунаал бас эрэдээктэрэ:
– «Чолбон» сурунаал эрэдээксийэтэ Алампа олохтообут үтүө үгэстэри салҕаан, саха литературатын ааспыт кэмин, бүгүҥҥү сайдыытын уонна инники кэскилин толору хабан үлэлииргэ дьулуһар. Саха литературатын летопиһа буолуохтаахпыт диэн тосхолунан сирдэттэрэбит. Үлэбит-хамнаспыт дьоммутугар-сэргэбитигэр үчүгэйдик тиийдин диэн аныгы олох тэтимигэр олорсон быйыл cholbon.online диэн сурунаал электроннай архыыбын оҥордубут. «Чолбон» 95 сыллаах баай историятын үйэтитээри былырыын Ем. Ярославскай аатынан Саха музейын өйөбүлүнэн М.К.Аммосов мемориал-дьиэтигэр быыстапка тэрийбиппит, Культура уонна искусство колледжын устудьуоннарын кытта үлэлэһэн театрдыы дьүһүйүүнү туруобуппут. Ону тэҥэ ааҕааччыларбытын уонна кинилэр уутуйан олорор улуустарын кытары тиһигин быспакка үлэлэһэбит – айар командировкалары сэргэ, анал нүөмэрдэри, айар түмсүүлэр хомуурунньуктарын оҥорон таһаарабыт, уус-уран тылбаас, кириитикэ боппуруостарыгар «төгүрүк остуоллары» тэрийэн ыытабыт. Эһэлэрин-эбэлэрин, ийэлэрин-аҕаларын саҕаттан тиһигин быспакка биһиги сурунаалбытын ааҕан улааппыт, олох олорор уонна «Чолбоҥҥо» тирэнэн ыччаттарын төрүт тыыҥҥа иитэр эрэллээх ааҕааччыларбытыгар, итиэннэ бары ааптардарбытыгар, редколлегиябыт чилиэннэригэр бу кыайыыбытыгар, быһаччы кыттыгастаах буоларгыт быһыытынан, барҕа махталбытын тиэрдиэбит! Күн – сири, «Чолбон» – саханы сырдатар!
