Литературная Якутия


 
30.12.2017
 

Кэлэн иһэр Саҥа Дьылынан!

Саха аатын үрдүктүк тутан

Суруйааччы айар үлэтэ үс тирэхтээх диэтэххэ сыыспаппыт буолуо: норуот айар кута, аан дойду классическай литературатын дириҥник билии-үөрэтии, саха норуотун өйүн-санаатын, норуот бэйэни билиниитин (самосознание), национальнай уратытын (национальная идентичность) өйдүүргэ уонна өйдөтөргө үлэ уонна ону атын норуоттарга тириэрдии буолаллар.

Саха омуга тыл баайын, күүһүн иҥэринэн илдьэ сылдьар дьонун – суруйааччылары, олох оллура-боллура төһө да олоҕу, сыаннастары уларыттар, ытыктыыр, сүгүрүйэр. Ол холобурунан саха норуодунай поэттарыгар, суруйааччыларыгар дьон-сэргэ ытыктабыллаах сыһыана буолар.

Бу ааһан эрэр 2017 сылга улуу бөлүһүөк Өксөкүлээх Өлөксөй, норуодунайдар: Сэмэн уонна Соппуруон Даниловтар, Күннүк Уурастыырап, Бүөтүр Тобуруокап, Семен Руфов үбүлүөйдээх төрөөбүт күннэрин норуот ахтан-санаан, махтанан бэлиэтээтэ. Хас биирдиилэрэ туспа суоллаах-иистээх суруйааччы буолан саха литературатын уонна тылын-өһүн, духуобунай олоҕун историятыгар хааллахтара.

Саныаххайыҥ бүгүн биһиги классикпыт эдэркээн Платон Слепцов – Платон Алексеевич Ойуунускай доҕорругар Максим Аммосовка оруобуна 100 сыл анараа өртүгэр, 1917 сыл ахсынньы 27 күнүгэр маннык суруйбуттаах:

“Наша будущность – в совершенном развитии этой поэзии и нашего на вид бедного и тяжелого языка, но языка весьма гибкого, образного. Наша история в том, чтобы свою литературу сделать общечеловеческим достоянием. Кто откажет в своеобразной и родной прелести слога и содержания нашей сказки? Кто откажет в крупности дара первому драматургу В. В. Никифорову, творцу “Манчары”? Кто откажет в талантливости поэту Кулаковскому А. Е.? Кто откажет как выразителю своего времени таланту А. И. Софронова? У нас язык живой и гибкий”.

Саха араас көлүөнэ суруйааччылара саха литературатын үтүө үгэстэрин быспакка салҕыы сайыннараллар. Саха суруйааччылара саха аатын, саха модун санаатын өрө тутан Платон Алексеевич эппитинэн Россия уонна аан дойду таһымыгар тахсан билиниини ылалларын быйылгы сыл өссө төгүл туоһулаата.

Айар тыын илбиһигэр ылларбыт, тыл сүмэтигэр бэриниилээх айар дьону уонна ааҕааччылары кэлэн иһэр Саҥа дьылынан итиитик-истиҥник эҕэрдэлиибин!

Олег Сидоров,
“Саха сирин суруйаччылара” ассоциация бэрэссэдээтэлэ