«Антология» бастакы тома — «Поэзия»
Россияҕа литература сылын чэрчитинэн «Россия норуоттарын билиҥҥи литератураларын Антологияларын» таһаарар туһунан быһаарыы ылыныллыбыта. Быйыл муус устар ыйга бастакы түһүмэх — «Поэзия» күн сирин көрбутэ.
Антологияны сүүмэрдээччилэр нуучча алфавитын быһыытынан литературалары омуктар тылларынан араарбыттар. Ол иһин эбэҥки уонна эбээн тылларынан түһүмэхтэргэ атын регионнар суруйааччылара эмиэ бааллар. Саха сириттэн эбэҥки, эбээн, юкагир уонна саха тыла киирбиттэр. Айымньылар бэйэ тылынан уонна нууччалыы тылбаастара бэчээттэммиттэр. Ону таһынан хас биирдии тылга кылгас киирии тыл бэриллибит. Онон Саха Өрөспүүбүлүкэтиттэн 4 тылынан 12 поэт айымньылара киирбиттэр: Александр Варламов, Василий Баргачан, Варвара Аркук (Белолюбская), Анатолий Степанов-Ламутский, Улуро Адо (Гаврил Курилов), Николай Курилов, Любовь Демина, Наталья Харлампьева, Иван Мигалкин, Наталья Михалёва-Сайа, Елена Слепцова-Куорсуннаах, Гаврил Андросов.
Поэзия антологиятын Российскай Федерация Бирисидьиэнэ Владимир Путин киирии тыла аһар. Кинигэҕэ барыта 57 тылынан 751 айымньы түмүллүбүт. Бу 229 поэт уонна 142 тылбаасчыттар үлэлэрэ. Антологияны таһаарыыга 800-чэкэ киһи үлэлээбит.
Инникитин «Оҕо литературата» уонна «Проза» антологиялара тахсаллара былааннанар.
