Литературная Якутия


 
01.10.2015
 
ПРОЕКТЫ СВФУ ИМЕНИ М.К.АММОСОВА
 

Университекка саха литературатын декадата

Университекка саха литературын декадата

Алтынньы 1-10 күннэригэр университет үрдүнэн саха литературатын декадата ыытылла турар. Бу тэрээһини Российскай Федерация Хотугулуу-Илиҥҥи олохтоох омуктар тылларын уонна культураларын институтун саха литературатын кафедрата тэрийдэ. Преподавателлэр, студеннар барыта 13 институкка, факультекка сылдьан лекциялары аахтылар, көрсүһүүлэри тэрийдилэр. Холобур, финансово-экономическай институкка профессор Н.Н. Тобуроков “История зарождения и развития якутской литературы”, математика уонна информатика институтугар кафедра сэбиэдиссэйэ В.Г. Семенова «Алампа. Таҥара буолбут киһи. Киһи буолбут Таҥара», медицинскэй институкка хотугу филология кафедратын доцена, ф.н.к. Винокурова А.А. “Эвенская поэзия: картина мира”, технологическай институкка уонна геолого-разведочнай факультекка доцент, ф.н.к. Архипова Е.А. “Иван Арбита – кэлэр кэм кынаттаах поэта”, юридическай факультекка доцент, ф.н.к. Григорьева Л.П. “П.А.Ойуунускай – саха норуотун чулуу уола”, омук тылын факультетыгар физико-техническэй институкка профессор В.Б. Окорокова “Золотые имена якутской литературы”, историческай факультекка профессор П.В. Сивцева “Золотые имена якутской литературы: А.Кулаковский” о.д.а. интэриэһинэй лекциялары аахтылар. Маны таһынан, устудьуоннар бэйэлэрэ тыл көтөҕөн “Роль писателя в современном обществе” диэн диспут тэрийдилэр, преподавателлэр Ирина Дмитриева, Н. Михалева – Сайа курдук биллиилээх суруйааччылары кытта көрүһүннэрдилэр, М.П. Попова салайааччылаах “Сэргэлээх уоттара” куруһуок атын факультет оҕолорун айар үлэҕэ көҕүлээтэ, литературнай үлэһит 4 куурсун устудьуоннара “Сүргэ көтөҕүү” диэн анал программалаах тиийэн кытыннылар. Атын салаалартан барыта 500-тэн тахса устудьуон хабылынна. Оҕолор “тыыннаах” суруйааччылары “тутан олорон” айар үлэҕэ хайдах киирбиттэрин, геройдарын, олоҕу көрүүлэрин туһунан, хайдах суруйааччы буолуохха сөбүн, о.д.а. туоһуластылар. Кинилэр ханнык салааҕа үөрэнэллэриттэн тутулуга суох, саха литературатын, классик суруйааччылары, Өксөкүлээҕи, Ойуунускайы, Алампаны, уос номоҕор киирбит талааннаах поэты Арбитаны интэриэһиргиир буоланнар, кинилэри анаан чинчийэр дьонтон үгүһү ыйыталастылар. Лекциялар ылыллыбыт темаларынан хаарчахтаммакка, устудьуоннар интэриэстэринэн литература, олох туһунан киэҥ кэпсэтиигэ тиийитэлээтилэр.

Атын салаа устудьуоннара төрөөбүт тылларын баһылаабыт оҕолор уустаан-ураннаан саҥаралларын, хоһоон ааҕалларын истэн сөхпүттэрин, истиҥ кэпсэтииттэн дуоһуйбуттарын эттилэр, интэриэһинэй көрсүһүү иһин махтаннылар.